සෙම්ප්‍රතිශ්‍යාව හැදෙන්න වගේද? උගුර රිදෙනවද? මෙන්නෙ ඔබට ගෙදරදීම කල හැකි පිලියම් අපෙන්

 

උගුරේ ආසාදන තත්ත්වයක් ඇති වෙන්න පුළුවන් හේතු කීපයක්ම තියෙනව. සෙම්ප්‍රතිශ්‍යා තත්ත්වයක් ඇතිවීමට පෙර මේ අයුරින් උගුරේ ආසාදනයක් ඇති වෙන්න පුළුවන්. මේ තත්වය නම් හුඟක් වෙලාවට දින දෙක තුනකින් ඇරිල යන්න පුළුවන්. එහෙමත් නැත්නම් බැක්ටීරියා ආසාදනයක් හෝ උගුරෙහි පටක වල සීරීමක් හෝ ඇදීමක් වැනි තත්ත්වයකදීත් උගුරේ ආසාදනයක් ඇති වෙන්න පුළුවන්. ශබ්ද නගා කතා කිරීමකට පසුව වැනි දේකදිත් මේ උගුර ආසාදනයක් ඇති වීම සාමාන්‍යයි. අනිවා අපි අද මේ කියන්න හදන්නෙ සෙම්ප්‍රතිශ්‍යා තත්ත්වයකදී උගුරේ ආසාදන අවස්ථාවක නිවසේදීම ඔබට කර ගත හැකි ප්‍රතිකාර කීපයක් ගැන.

බැක්ටීරියා ආසාදනයක් හෝ උගුරේ පටක වලට හානි ඇති වූ අවස්ථාවක අත් බෙහෙත් වලට වඩා වෛද්‍ය ප්‍රතිකාර වලට යොමු වීම වඩාත්ම සුදුසුයි. කුඩා දරුවන්, අධික ලෙස දුම්පානයට ඇබ්බැහි වූවන්, ප්‍රතිශක්තිකරණ පද්ධතියේ දුර්වලතා ඇති අය සහ ආසාදන තත්ත්වයන් ඇති අය උගුරේ ආසාදනයකදී ගෙදරදී කරන මෙවැනි අත් බෙහෙත් වලට යොමු නොවී වෛද්‍ය ප්‍රතිකාර සඳහා යොමුවීම අනිවාර්යයි කියලත් මතක් කරන්න ඕනෙ.

 

1. උගුර ආසාදනයක ලක්ශණ මොනවද?
Sore Throat Remedies
Source – vixper.com

උගුර වියලීම, උගුරේ කැසීමක්, වේදනාවක්, ආහාර පාන ගිලීමේ අපහසුතාවයක් සහ කතා කිරීමේදී ඇති වෙන වේදනාව හෝ හඬ වෙනස් වීම මූලික ලක්ශණයි.

 

2. කල යුතු නොකල යුතු දේ
Sore Throat Remedies
Source – olwomen.com

උගුරෙ අමාරුවක් ආවම උණු උණුවෙන්ම මොනවා හරි දෙයක් බොන එක හරිම සනීපයි කියල තමා අපිට හිතෙන්නෙ. නමුත් සාමාන්‍යෙන් අපි පානය කරනවාට වඩා රස්නෙන් වතුර හෝ තේ හෝ පානය කිරීම ඒ තරම් හොඳ දෙයක් නෙවෙයි.

උණු උණුවෙන්ම හදාගන්න මේ ඖෂධීය පානයන් පානයට ප්‍රථම එහි හුමාලය ආඝ්‍රාණය කිරීමෙනුත් ඔබට තරමක සහනයක් ලබාගන්න පුළුවන්. බීමට හැකි තරම් නිවුනු පසු මේ සෑම පානයක්ම ලබාගන්න ඕනෙ.

උගුර වියලිව පැවතීම නිසාත් උගුරේ වේදනාව සහ අපහසුතාවය වැඩි වෙන්න පුළුවන් නිසා නිතරම ජලය පානය කිරීම වඩාත් සුදුසුයි. විජලනය වීමෙන් වැලකී සිටීම අනිවාර්යයි.

 

3. ලුණු මිශ්‍ර උණුවතුර
Sore Throat Remedies
Source – stylecraze.com

පොඩි කාලෙ ඉඳන්ම උගුරෙ අමාරුවක් කියූ සැණෙන් අම්මල අපිට දෙන පලවෙනි අත් බෙහෙත මේ. ඒත් හිතු මතේට ලුණු බෝතලෙන් ලුණු දාල උගුර සේදීම කරන එක හොඳ නැහැ. ඒ වගේම කටට ගන්න බැරි තරම් රස්නෙන් වතුර ගන්න එකත් නිවැරදි ක්‍රමය නෙවෙයි. අත දැමිය හැකි තරම් මද රස්නෙ වතුර මිලිලීටර් 230කට ලුණු කුඩු තේ හැඳි 1\4ත් 1\2ත් අතර ප්‍රමාණයක් මිශ්‍ර කර යන්තමින් උගුර සේදීම කල යුතුයි.

 

4. වැල්මී
Sore Throat Remedies
Source – brands-list.com

වැල්මී වල අඩංගු රසායන උගුරේ පේශීන් වල ඉදිමුම අඩු කර සහනය සලස්වා කැස්ස අඩු කිරීමට උපකාර වෙනව. හොඳින් පිරිසිදු කරගත් වැල්මී කැබැල්ලක් සැපීමට මෙන්ම උණුවතුරෙන් තම්බා පානය කිරීමද, කුඩු කර ප්ලේන් ටී වලට එක් කර පානය කිරීමද කල හැකියි.

 

5. මී පැණි
Sore Throat Remedies
Source – suebee.com

ස්වභාවික විශබීජ නාශකයක්. පිරිසිදු මී පැණි තේ හැඳි 2ක් නිකම්ම ගැනීම හෝ උණුවතුර කෝප්පයකට  මී පැණි තේ හැඳි 2ක්, දෙහි යුශ තේ හැන්දක් මිශ්‍ර කර පානය කිරීමෙන්ද උගුරේ ඇති වෙන අපහසුතාවයන්ට කදිම පිළියමක්.

 

6. මිංචි කොළ
Sore Throat Remedies
Source – youtube.com

උගුරේ වේදනාව සමනය කිරීමට මිංචි කොල කිහිපයක් උණු වතුරට කෝප්පයකට දමා එයට මී පැ ණි තේ හැන්දක් එක් කර පානය කරන්න. මිංචි කොල වලින් උගුරේ ඉදිමුමම අඩු කර වේදනාවට සහනය සලසනව.

 

7. කරාබු නැටි
Sore Throat Remedies
Source – inside.lk

කැස්සත් සමඟ එන උගුරේ වේදනාවට කරාබු නැටි වලින් ඔබට සහනයක් ලබාගන්න පුළුවන්. තලාගත් කරාබු නැටි 7,8ක් උණුවතුර කෝප්පයකට දමා වසා විනාඩි 5ක් තබා පානය කරන්න.

 

8. ඉඟුරු
Sore Throat Remedies
Source – fragrantica.com

තලාගත් ඉඟුරු කැබැල්ලක්, මී පැණි තේ හැන්දක්, දෙහි යුශ මේස හැන්දක් එක් කරගත් උණුවතුර කෝප්පයක් පානය කිරීමෙන් උගුරෙහි වේදනාවට මෙන්ම උගුරේ අමාරුව සමඟ එන කැස්ස ගතියට පිලියම් කරගත හැකියි.

 

9. උළුහාල්
Sore Throat Remedies
Source – spiceparadise.lk

උළුහාල් තේ හැඳි දෙකක් නටන වතුරේ විනාඩි 30ක් තම්බා ඒ වතුරෙන් උගුර සේදීමෙන් කැස්ස නිසා උගුරේ ඇති වූ තුවාල ඉක්මණින් සුව වීමට සහ ඉදිමුම් ගතිය පහව යාමට උපකාර වෙනව.

 

10. කුරුඳු සහ මී පැණි
Sore Throat Remedies
Source – healthline.com

කුරුඳු කුඩු තේ හැඳි 1\2ක් සහ මී පැණි තේ හැන්දක් එක් කල උණුවතුර හෝ කිරි කෝප්පයක් පානය කිරීමෙන් ඉදිමුනු සහ වේදනා දෙන උගුරට පිලියම් කර ගත හැකියි.

 

Disclaimer – මේ ප්‍රතිකාර ක්‍රම කිරීමේදී ඔබට ඇති ආසාත්මිකතා ගැන දැනුවත් වන ලෙස වගේම තදබල ලෙස පවතින උගුරේ අපහසුතාවයකදී වෛද්‍ය උපදෙස් ලබාගන්නා ලෙසත් අනිවා මතක් කරන්න කැමතියි.

 
Cover Image Source – medicinenet.com