බොලිවුඩ් සිනමා සක්විති ශාරුක් ඛාන්ගෙ සිනමා ජීවිතේ වැදගත්ම සහ වෙනස් රංගනයන් සහිත චිත්‍රපට 11ක්

 

ශාරුක් ඛාන් ගැන මතක අවුස්සද්දි මුලින්ම එන මතකයක් තමයි  90 ගණන්වලදි මෙහෙ ටීවී එකේ පෙන්වපු ෆවුජි ටෙලි නාට්‍යය. ශාරුක් ඒකෙ රඟපෑවෙ අභිමන්‍යු රායි කියන සෙබලෙක්ගෙ චරිතයක්. ඊට පස්සෙත් ඉඳහිට ශාරුක් ඛාන්ව අපිට රූපවාහිනියෙන් මුණ ගැහෙනව. එන්න එන්නම මේ මුණගැහීම් වැඩි වෙද්දි ශාරුක් බොලිවුඩයෙ ජනප්‍රියම නළුවෙක් වෙලාය කියල අපිට දැනෙන්න ගන්නව. ශාරුක්ගෙ හැම ෆිල්ම් එකක්ම වගේ හිට් වෙන්නත් ගන්නව. මිනිස්සු ශාරුක්ගෙ ෆිල්ම් එනකම් බලන් ඉන්නෙ හෝටලේක රස කෑමක් පිළියෙල වෙලා එනකම් නොඉවසිල්ලෙන් බලන් ඉන්න බඩජාරියො ටිකක් වගේ. ශාරුක්ගෙ ෆිල්ම් ඇතුලෙ තියෙන්නෙ සැරටම දැනෙන හැඟීම් ගොඩක මිශ්‍රණයක්. චිත්‍රපටයෙ පළවැනි පැයේදි බඩවල් අල්ලගෙන හිනාවෙන මිනිස්සු, දෙවැනි පැයේදි කාටත් හොරෙන් තමන්ගෙ කඳුළු පිහිදගන්න හැටි අපි සැවෝයි එකේදිත් දැකල තියනව.

සමහරු කියන්න පුලුවන් ශාරුක් කියන්නෙ බොළඳ චරිත, මල් චරිත වලටම කොටු වෙලා ජනප්‍රියත්වය කරා ආපු නලුවෙක්ය කියල. හැබැයි ඒ හුඟ දෙනෙක් ශාරුක් සිනමාව ඔස්සේ ආපු ගමන් මග ගැන දන්නවා අඩු නිසයි එහෙම කියන්නෙ. අපි බලමුද කොහොමද ශාරුක් තමන්ගෙ චිත්‍රපට හරහා ටිකෙන් ටික බොලිවුඩ් කිරුළ දක්වා නැග්ගෙ කියල? මේ කියන්න හදන්නෙ ශාරුක්ගෙ රංගන ජීවිතයට වැදගත්ම වෙච්ච සිනමා පට 12ක් ගැන.

 

1) දීවානා (1992) – වාසනාවන්ත ආරම්භය
Best Movies of Shah Rukh
Source – postimg.org

ශාරුක් ඛාන් බොලිවුඩ් සිනමාවට එන්නෙ දීවානා චිත්‍රපටයෙන් තමයි. මේ චිත්‍රපටය විශේෂ වන කාරණා කීපයක් තියනවා. දීවානා චිත්‍රපටයට ශාරුක්ට සම්බන්ධ වෙන්න ලැබෙන්නේ ඒ චිත්‍රපටයේ ප්‍රධාන චරිතයක් රඟන්න හිටපු නලුවෙක් චිත්‍රපටය හැරයාමත් එක්කයි. ඒ අනුව තමයි රිශී කපූර් සහ දිව්‍යා භාරතී එක්ක ප්‍රධාන චරිතයකින් එකතු වෙමින් ශාරුක්ට බොලිවුඩයට ඇතුලුවෙන්න අවස්ථාව ලැබෙන්නෙ. දීවානා චිත්‍රපටය ඉතාම සුන්දර ගීත රැසක් තිබ්බ චිත්‍රපටයක්. මේ චිත්‍රපටය සඳහා ශාරුක්ට ඒ අවුරුද්දෙ ෆිල්ම් ෆෙයාර් එකේදි හොඳම නවක නළුවා සම්මානෙත් හිමිවෙනව. ඒ විතරක් නෙමෙයි, තවත් පුදුම හිතෙන කාරණේකුත් තියනව. ඒ තමයි දීවානා තිරගත කරල අවුරුදු 25කුත් ගත වුණත් අද වෙනකම් ශාරුක් මේ චිත්‍රපටය නරඹලා නැති එක. තමන් රඟපාන පළවෙනි සහ අවසාන චිත්‍රපටය තමන් නරඹන්නෙ නෑ කියලයි ශාරුක් කියන්නෙ.
 

 

2) බාසිගර් (1993) – නිර්භීත දුෂ්ට චරිත රඟපෑම
Best Movies of Shah Rukh
Source – srk-news.livejournal.com

තම සිනමා ජීවිතේ ආරම්භ කරපු හැටියේ දුෂ්ට චරිතයක් රඟපාන එක හුඟක් බොලිවුඩ් නලුවො දකින්නෙ තමන්ගෙ අනාගත ජනප්‍රියත්වයට, හීරෝ කැරැට්ටුවට කරගන්න මහ විනාසයක් හැටියටයි. හැබැයි ශාරුක් ඛාන් එහෙම හිතන කෙනෙක් නෙමෙයි. සල්මාන් ඛාන් විසින් ප්‍රතික්ෂේප කරන බාසිගර්හි දුෂ්ට චරිතය ශාරුක් බාර ගන්නව. ශාරුක් කාජොල් සුසංයෝගය මුල් වරට ඇති වෙන්නෙත් මේ චිත්‍රපටයෙ තමයි. බාසිගර් වාණිජ අතින් ඉතාම සාර්ථක චිත්‍රපටයක් බවට පත්වෙනව. ශාරුක්ට තමන්ගෙ පළවැනි ෆිල්ම් ෆෙයාර් හොඳම නළුවා සම්මානෙ හිමිවෙන්නෙත් බාසිගර් චිත්‍රපටයෙන් තමයි. බාසිගර් එකේ මතක හිටින රඟපෑමත්, ෆිල්ම් ෆෙයාර් සම්මානයත් ශාරුක්ව තවත් ලෙවල් එකකින් උස්සලා තියන්න සමත් වෙනව.
 

 

 

3) ඩර් (1993) – වීරයා පැරදවූ දුෂ්ටයා
Best Movies of Shah Rukh
Source – theyouthmagazine.com

බාසිගර් චිත්‍රපටයෙන් පස්සෙ ශාරුක් ආයෙත් ප්‍රේක්ෂකයා හමුවට එන්නෙ තවත් නෙගටිව් රෝල් එකකින්. ඒ ඩර් චිත්‍රපටයෙන්. “ජාදූ තේරී නසර්…” සින්දුව තියන, “අයි ලවු යූ ක්. ක්. ක්. ක් කිරන්…” කියාගෙන පිස්සෙක් වගේ ජුහී චවුලගෙ පස්සෙන් යන චරිතය ශාරුක් මේකෙදි නියමෙට කරනව. මේක ශාරුක් ඛාන්ගෙ හොඳම රඟපෑමක්ය කියල අපිට කියන්න අමාරුයි. ඒ උනත් ඩර් චිත්‍රපටය හිට් එකක් උනේ ශාරුක් නිසා කියන එක නම් අනිවා පිළිගන්න වෙන දෙයක්. තවත් කෙනෙක් එක්ක ආදරෙන් බැඳිල ඉන්න කෙල්ලෙක්ව හිමිකරගන්න උන්මත්තක ස්වභාවයෙන් පස්සෙන් යන, දුෂ්ට වැඩ කරන චරිතයක් තමයි ශාරුක්ට කරන්න පැවරිලා තිබ්බෙ. මේ චරිතෙට ශාරුක් කොච්චර වෙනසක් එකතු කරල සාධාරණයක් කලාද කියනවනම් මේ චිත්‍රපටය අවසන් වෙන්නෙ දුෂ්ටයා හීරෝටත් වඩා ප්‍රසිද්ධ වෙලා. හින්දි චිත්‍රපට වල සාමාන්‍යයෙන් දකින්න තියන විදිහේ ෆ්ලැට් සහ බෝරිං දුෂ්ට චරිතයක් උනත් කොච්චර දැනෙන්න රඟපාන්න පුලුවන්ද කියල ශාරුක් මේ චිත්‍රපටයෙන් ඔප්පු කරල පෙන්නනව.

ඩර් ෆිල්ම් එකට ශාරුක් හොඳම දුෂ්ට නලුවා හැටියටත් ෆිල්ම් ෆෙයාර් වලට නිර්දේශ වෙනව. ඒ පාර දුෂ්ට නළුවා සම්මානෙ දිනා ගන්න බැරි උනත්, ඊට අවුරුද්දකට පස්සෙ වෙනත් චිත්‍රපටයක් හරහා දුෂ්ට චරිත රංගනේකින් ෆිල්ම් ෆෙයාර් දිනන්න ශාරුක්ට හැකියාව ලැබෙනව. ඒ චිත්‍රපටය තමයි මධුරි එක්ක රඟපාපු “අන්ජාම්” චිත්‍රපටය.
 

 

4) කභි හාන් කභි නා (1994) – පරාජිත පෙම්වතා
Best Movies of Shah Rukh
Source – dunedain-srk.net

ශාරුක් ඛාන් රඟපාපු චිත්‍රපට අතරින් වැඩිපුරම කියවෙන්නෙ නැති නමක් තමයි මේ චිත්‍රපටය. මේක ගොඩ දෙනෙක් බලලත් නැතිව ඇති. හැබැයි මුල් කාලෙ ශාරුක්ගෙ හොඳම සහ ස්වභාවික රංගනයක් තිබ්බ චිත්‍රපටයක් හැටියට අපිට මේ චිත්‍රපටය හඳුන්වන්න පුලුවන්. මේකත් අන්සතු ළඳකට පෙම් කරන ටයිප් චිත්‍රපටයක් තමයි. හැබැයි මේකෙ ශාරුක් රඟපාන්නෙ දුෂ්ට චරිතයක් නෙමෙයි. කභි හාන් කභි නා කියන්නෙ තමන් රඟපාපු චිත්‍රපට අතරින් තමන්ගේ ප්‍රියතම චිත්‍රපටය කියලත් වරක් ශාරුක් ප්‍රකාශ කරනව. ඒ කාලෙ නළුවො වැඩි දෙනෙක් භාරගන්න අකමැති විදිහේ පරාජිතයෙක්ගෙ චරිතයක් රඟපෑවත්, චිත්‍රපටය පුරාවටම ප්‍රේක්ෂකයන්ට දැනෙන විදිහෙ රංගනයක් නිරත වෙමින් මේ චිත්‍රපටයෙනුත් කැපී පෙනෙනම චරිතය කරන්න ශාරුක්ට හැකියාව ලැබෙනව.
 

 

5) දිල්වාලේ දුල්හනියා ලේ ජායෙන්ගේ (1995) – ශාරුක්ගේ ජීවිතය වෙනස්කල චිත්‍රපටය
Best Movies of Shah Rukh
Source – studioflicks.com

ආදායම් වාර්තා තියමින් අවුරුදු ගාණක් තිස්සේ සිනමාහල් වල දුවපු “දිල්වාලේ දුල්හනියා ලේ ජායෙන්ගේ” චිත්‍රපටය තමයි ශාරුක් ඛාන් අද ඉන්න සුපර් ස්ටාර් මට්ටමට මුල් පියවර තිබ්බ චිත්‍රපටය. පෙම්වතා චරිතය කළින් රඟපාල තිබුණත් මේ චිත්‍රපටයෙන් පස්සෙ තමයි බොලිවුඩයේ රෝමාන්තිකම පෙම්වතා හැටියට ශාරුක්ව හැඳින්වෙන්න පටන් ගන්නේ. බාසිගර් චිත්‍රපටයෙන් මුල් වරට හමුවුණ කාජොල් එක්ක සුසංයෝගය නියමෙටම වැඩ කරන්නෙ දිල්වාලේ දුල්හනියා ලේ ජායෙන්ගෙ වලින් තමයි. එතැන ඉඳල තව දශකයක් විතර යනකම්ම මේ දෙන්නට හින්දි සිනමා ඉතිහාසයේ හොඳම යුවලක් හැටියට වැජඹෙන්න ලැබෙනව. ඒ විතරක් නෙමෙයි DDLJ චිත්‍රපටය ලබන අතිසාර්ථකත්වයත් එක්කම බොලිවුඩ් ප්‍රේමාන්විත චිත්‍රපට රැල්ලකටත් පාර කැපෙනව. මුල් භාගයෙ ලවු සින්දු සහ අන්තිම හරියෙ සටන් ජවනිකා පිරිච්ච සාම්ප්‍රදායික බොලිවුඩ් චිත්‍රපට රටාව වෙනස් වෙලා ආදරය, පවුල සහ පුද්ගල සම්බන්ධතා ගැන කතා කෙරෙන චිත්‍රපට වැඩිපුර බිහිවෙන්න පටන් ගන්නවා.
 

 

6) දිල් සේ… (1998) – අභියෝගාත්මක චරිත රංගනය
Best Movies of Shah Rukh
Source – twitter.com/svetik92

ශාරුක් ඛාන් සහ මනි රත්නම් කියන්නෙ එකකට එකක් පෑහෙන්නෙ නැති නම් දෙකක් කියල බැලූ බැල්මට හිතේවි. මනි රත්නම්ගෙ සිනමාව කියන්නෙ සාමාන්‍ය බොලිවුඩ් සිනමාපට වලට වඩා වෙනස් දේවල් සිද්ධ වෙන, යතාර්ථයට වඩාත් ළඟ චිත්‍රපට. බොලිවුඩ් වල ඒ වෙද්දි හිටපු ප්‍රේමාන්විතම නළුවව සහ මනීෂා කොයිරාලව එක් කරල මනි රත්නම් හදන දිල්සේ චිත්‍රපටය අඳුරු, ත්‍රාසජනක, ආදර කතාවක් කියල හඳුන්වන්න පුලුවන්. මේ චිත්‍රපටයේ දෙබස් වල භාවිතයත් ඉතා වැඩියි. ඒවත් අර සාම්ප්‍රදායික ආදර කතා වල දකින්න තියන තාලෙ මල් ටයිප් දෙබස් නෙමෙයි. ඒ අතින් ගත්තහම ශාරුක්ගෙ සිනමා ජීවිතේ මුහුණ දෙන්න ලැබුණු ලොකුම අභියෝගයක් තමයි දිල් සේ චිත්‍රපටය. හැබැයි මේ අභියෝගය මොන තරම් දරුණු උනත් අවසානයේදී ඉහලම ලකුණු ඇතිව මේක ජයගන්න ශාරුක් ඛාන් සමත් වෙනවා. අදටත් ශාරුක්ගෙ හොඳම රංගනයක් විදිහට දිල් සේ චිත්‍රපටයේ ශාරුක්ගෙ රඟපෑම අපිට දක්වන්න පුලුවන්.
 

 

7) දේව්දාස් (2002) – දේව්දාස්ගේ පුනරුප්පත්තිය
Best Movies of Shah Rukh
Source – imdb.com

ශාරුක්ගෙ රංගනයන් ගැන කතා කරද්දි දේව්දාස් කියන්නෙ අපිට අතහරින්නම බැරි චිත්‍රපටයක්. ඒකට හේතු කීපයක්ම තියනවා. එකක් තමයි 1955 අවුරුද්දෙ මුල්වරට හදපු දේව්දාස් චිත්‍රපටය හින්දි සිනමා ඉතිහාසයේ සුවිශේෂීම චිත්‍රපටයක් වීම. දෙවැනි හේතුව තමයි ඔරිජිනල් දේව්දාස් හැටියට රඟපාපු දිලිප් කුමාර් ඒ චිත්‍රපටයෙ විශිෂ්ට රංගනයක නිරත වෙලා තිබීම. මේ හින්ද සංජය ලීලා බන්සාලි දේව්දාස් රීමේක් කරනව කිවුවම හුඟක් අය අහන්න ගත්තා දේව්දාස් ආපහු හදල තේරුමක් තියේද කියල. ශාරුක් ඛාන් දේව්දාස් චරිතය කොහොම නිරූපණය කරයිද කියලත් හුඟ දෙනෙක් සැක පහල කලා. හැබැයි අවසානයේදී ඒ සියලු සැක සංකා ඉවත හෙලමින් ශාරුක්ගෙ රංගනය වගේම දේව්දාස් චිත්‍රපටයත් සාර්ථක, ජනප්‍රිය චිත්‍රපටයක් බවට පත්වුණා. ඛේදාන්තයක් කරා ඇදෙන ආදර කතාවකින් සමන්විත මේ චිත්‍රපටයේ මධුලොල්, දුක්ඛිත ප්‍රේමවන්තයාගෙ චරිතයට ශාරුක් ආරූඪ වෙලා රඟ දැක්වුව කියල කියන්න පුලුවන්. දෙබස් වගේම සුළු සුළු ඉරියව් වලින් පවා මේ චිත්‍රපටයේ රංගනයට ශාරුක් ගත්ත වෙහෙස කැපිල පේනව. ශාරුක්ම කියනව මේ චිත්‍රපටය රූගත කරන කාලය පුරාවටම ඔහු ගතකලේ දුකෙන්ය කියල.
 

 

8) ස්වදේශ් (2004) – ශාරුක්ගේ විශිෂ්ටතම රංගනය?
Best Movies of Shah Rukh
Source – storypick.com

ස්වදේශ් චිත්‍රපටයේ රංගනය ශාරුක්ගේ හොඳම රංගනය කියලයි ගොඩ දෙනෙක් හඳුන්වන්නෙ. මේකත් අර අපි කලින් කියපු දිල් සේ චිත්‍රපටය වගේම ශාරුක්ව අඩුවෙන් මතුවෙලා ශාරුක් රඟපාන චරිතය වැඩියෙන් ඉස්මතු වෙන චිත්‍රපටයක්. නාසාහි රැකියාව කරන මෝහන් භර්ගවා කියන විද්‍යාඥයා ඉන්දියාවේ ගමකට ඇවිල්ල ඒ අයට විදුලි බලය ලබාදෙන්න උත්සාහ කරන සිදුවීමක් වටා තමයි මේ චිත්‍රපටයේ මූලික කතාව ගෙතෙන්නෙ. බොහෝම ස්වභාවික විදිහේ රංගනයක නිරත වෙමින්, ශාරුක් ඛාන්ව අමතක වෙන තරම්ම හොඳින් මේ චරිතය ශාරුක් විසින් ගොඩ නගනවා. ආදායම් අතින් අසාර්ථක චිත්‍රපටයක් උනත් හින්දි සිනමා ඉතිහාසයේ බිහිවූ විශිෂ්ටතම චිත්‍රපටයක් හැටියටත්, ශාරුක් ඛාන්ගෙ හොඳම රංගනයක් දකින්න ලැබුණ චිත්‍රපටයක් හැටියටත් මේ චිත්‍රපටය මතකයේ රැඳී තියේවි.
 

 

9) චක්දේ! ඉන්දියා (2007) – මතකයේ රැඳෙන කබීර් ඛාන්
Best Movies of Shah Rukh
Source – blog.daum.net

බොලිවුඩයෙන් බිහිවෙච්ච හොඳම ක්‍රීඩා චිත්‍රපටයක් තමයි චක්දේ ඉන්දියා. මේ චිත්‍රපටයත් ස්වදේශ් වගේම රංගනය පැත්තෙන් ශාරුක්ගෙ ප්‍රතිභාව කැපී පෙන්වන්න සමත් වෙච්ච චිත්‍රපටයක්. සාමාන්‍යයෙන් ශාරුක්ව දකින්න නොලැබෙන විදිහේ චරිතයකින් තමයි චක්දේ චිත්‍රපටයෙන් ශාරුක් අප හමුවට එන්නෙ. ඉන්දීය කාන්තා හොකී කණ්ඩායම පුහුණු කරවන “කබීර් ඛාන්” කියන පුහුණුකරුගේ චරිතය තමයි මේකෙ ශාරුක් රඟදක්වන්නෙ. ජාති කුල ආගම් භේද, ලිංග භේද පසෙකින් තියල රටක් හැටියට එකාවන්ව ක්‍රියා කරන හැටි කියල දෙන නියම ඉන්ස්පිරේෂනල් ෆිල්ම් එකක් මේක. ශාරුක් ඛාන්ගෙ රංගන ජීවිතේ සන්ධිස්ථානයක් හැටියටත් චක්දේ ඉන්දියා චිත්‍රපටය හඳුන්වන්න පුලුවන්.
 

 

10) මයි නේම් ඉස් ඛාන් (2010) – සංවේදී චරිත රංගනයක
Best Movies of Shah Rukh
Source – berlinale.de

මයි නේම් ඉස් ඛාන් චිත්‍රපටයෙනුත් වෙනස්ම ආකාරයේ චරිත රංගනයක නිරත වෙන්න ශාරුක්ට අවස්ථාව ලැබෙනවා. ඒ ඇස්පර්ගර්ස් සින්ඩ්‍රෝමයෙන් පෙළෙන මුස්ලිම් තරුණයෙක්ගෙ චරිතයක්. තමන් ත්‍රස්තවාදියෙක් නොවන බවට ඔප්පු කරන්න ඇමරිකා එක්සත් ජනපදයෙ ජනාධිපතිව හමුවෙන්න යන රිස්වාන් ඛාන්ගෙ සංවේදී කතා පුවත තමයි මයි නේම් ඉන් ඛාන් වෙතින් දිගහැරෙන්නේ. කාලෙකට පස්සෙ ශාරුක් කාජොල් සුසංයෝගය දකින්න ලැබුණු මේ චිත්‍රපටය ඉන්දියාවෙන් පිටතදීත් සාර්ථකව තිරගත වුණා. ඒ උනාට මේ චිත්‍රපටය ගැනනම් වැඩි හොඳක් කියන්නට අපිට හැකියාවක් නැහැ. චිත්‍රපටයේ මුල් භාගයේදී චිත්‍රපටයත්, ශාරුක්ගෙ චරිතයත් ගොඩ නැගීගෙන ආපු විදිහ චිත්‍රපටයේ දෙවැනි භාගයේදී බිඳ වැටෙනව කියලයි අපිට හිතුනෙ. කොහොම වෙතත් “ඛාන්” චරිතයත් අපිට දැනෙන විදිහට රඟපාන්න ශාරුක් සමත් වෙනව.
 

 

11) ෆෑන් (2016) – නලුවා සහ රසිකයා
Best Movies of Shah Rukh
Source – bollywoodhungama.com

ඛාන්ගෙන් පස්සෙ අපි එනව ෆෑන් වෙත. ෆෑන් චිත්‍රපටයෙන් ශාරුක්ට ලැබෙන්නේ රංගන ශිල්පියෙකුට ලැබෙන ඉතාම දුර්ලභ ගණයේ චරිත රංගනයක යෙදෙන්න තමයි. සුපර්ස්ටාර් ආර්යන් ඛන්නා කියන ශාරුක්ගෙ සැබෑ ජීවිතයට ආසන්න චරිතයකුත්, ගෞරව් චන්ද්නා කියන ඔහුගේ හොඳම රසිකයාගෙ චරිතයත් යන දෙකම ශාරුක් විසින් රඟදක්වනව. ස්වදේශ් සහ චක්දේ ඉන්දියා චිත්‍රපට වලදි වෙනස් සහ කැපී පෙනෙන රංගනයන් කරපු ශාරුක් දැන් ඒ විදිහෙ චරිත කරන්නෙ නැත්තෙ ඇයි කියල අහපු බහුතරයක් ප්‍රේක්ෂකයන්ටත් ෆෑන් චිත්‍රපටය හරහා පිළිතුරු දෙන්න ශාරුක් සමත් වෙනව.
 

 
Cover Image Source – indianexpress.com